1. Me sött vill meh
2. Vroni
3. Bawilermoos
4. Läbe i üsem Land
5. Früehligstag
6. än tragische Fall
7. Sonntigmorge
8. Säg mer din Name
9. Än chline Gedanke
10. Wiehnacht
11. Alles vorbi

Me sött vill meh
Me sött vill meh säge
säge was mer denkt
me sött vill meh lose
au wenn's eim schier ushenkt

me sött vill meh lache
vom morge früeh bis schpot
me sött vill meh briegge
au wenn's niemert recht verschtoht

s'wär eifach so eifach, es bruchti nu chli Muet
s'wär eifach so eifach und nochher isch es wieder guet

Me sött vill meh glaube a s'Guete i dä Weit
me sött vill meh zwiifle
wenn ein immer vom Glaube verzellt

me sött vill meh liebe
Liebi geh und neh
me sött vill meh schtritte
und sich nochher wieder vergeh

s'wär eifach so eifach, es bruchti nu chli Muet
s'wär eifach so eifach und nochher isch es wieder guet

me sött vill meh läbe
us sich use goh
me sött vill meh schtärbe und denn wieder uferschtoh

Vroni
Vroni säg was isch mit der
lueg mi doch wenigschtens 'mol a
Vroni i cha nüt däför
wan'i der gsait ha isch doch wohr
Vroni mach mer's doch nöd so schwer

Vroni es tuet mer leid
i geb zue i ha der wüeschti Sache gsait
chomm bis wieder lieb und gib mer d'Hand

Vroni so cha's nöd wiiter go
mer sind doch erwachsni Lüt
Vroni i cha di nöd verschtoh
eifach schmolle bringt doch nüt
Vroni gib's doch uf

Vroni es tuet mer leid...

Vroni du machsch mi no konfus
i chomm nüme drus
Vroni wie söll die Welt denn Friede ha
wenn nöd 'mol mer zwei üs verschtönd?
Vroni ... i weiss nöd

Vroni es tuet mer leid...

Bawilermoos
Chomm doch no eimol
mit mer is Bawilermoos
i das gheimnisvoIli Gländ
wo mer üs gfunde händ

döt leg i no eimol
min Chopf i din Schoss
und gib mi eifach hi
so wien'i bi
verzell der Gschichte
und tue der brichte
i zeige dir mis Herz und mini Seel
chomm doch no eimol...

chomm doch no eimol
mit mer is Bawilermoos
wo mer so vill ghöcklet sind
scho als Chind

säg nüt, i weiss scho
i dim Hals isch än Kloss
wo du nöd abe bringsch
und so schwer ninsch

muesch nöd dra denke
lo di beschenke
vo minere Liebi und vo dä Natur
chomm doch no eimol...

öbermorn scho fangets do a baue
versaue und zämehaue
öbermorn do schtirbt das Schtückli Erde
s'isch zum verruckt werde

Läbe i üsem Land
Was isch los mit üsem Land?

immer meh Lüt schtellet d'Frog
wie das mit üs no wiiter goht
mit em Läbe i üsem Land

me gsieht's landuf landab
üses Land wird immer meh zur Stadt
chomm säg wo bliibt s'Läbe i üsem Land?

mer läbed ziemlich eng
ufenand
und sind üs trotzdem fremd
was trennt üs vonenand i üsem Land?

jo mer renned hin und her
ufe abe chrüz und quer
verbruched üsi Zit und Energie
und näbezue verändret sich
üsi Welt ganz wesentlich
und mer im Vollgaracho dra vorbi

i üsem Land git's Differenze
öber d'öffnig vo dä Grenze
wo sind d'Grenze vo üsem Land?

dä Alt wo sich beschwert
die alte Wert sind nüt meh wert
wo sind die neue Wert i üsem Land?

jo immer meh Lüt schtellet d'Frog
wie das mit üs no wiiter goht
mit ein Läbe i üsem Land

wien'es Boot im offne Meer
so schauklet mer 'chli hin und her
ängschtlich und mit wenig Zueversicht
am Rueder immer no die gliche
niemert andersch als du und ich
chomm säg, wenn isch endlich Land in Sicht?

Früehligstag
D'Kioskverchäuferin isch nett
obwohl i nu Geld wechsle wött
und im Zug dä Kondukteur
get mer s'Billet und wött nüt däför

uf dä Polizeihauptwach isch Rueh
d'Polizischte jassed und händ nüt meh z'tue
und sogar im Militär
goht's hüt ganz familiär zue und her

d'Lüt redet mitenand
grüessed sich und gend sich d'Hand
und niene ghörsch ä böses Wort
i däm schwizer Durchschnittsort

hüt isch än sonnige Früehligstag
wo niemert Trüebsal blose mag
d'Lüt mached d'Herz und Fenschter uf
und nehmed ganz än tüüfe Schnuuf

uf em Balkon sitzt d'Frau Schai
isst Schoggi und rasiert sich d'Bei
vo obe lueged amüsiert
dä Nochbur wo sosch immer reklamiert

dä Husabwart putzt sin Grill
wil er hüt no grille will
und wer vorbi chunnt ladt er i
zom'ne chline Fäscht mit guetem Wy

d'Chind baued sich ä Welt
us Tüecher zom'ne grosse Zelt
sie chrüched ine und dänn use
und wöred z'Obig gern drin pfuuse

hüt isch än sonnige Früehligstag...

us all dem Grau wird wieder Grüe
was d'Mensche gsetzt händ fangt a blüe
wer hett das denkt im Winter no
dass d'Welt nomol chönnt uferschtoh?

dä Lieb Gott hät sich's öberleit
hät "Jo" zo üs Mensche gsait
vom Säugling bis zom alte Ma
fangt s'Läbe nomol vorne a

hüt isch än sonnige Früehligstag...

än tragische Fall
I üsem Dorf do läbt än Ma, dä isch bekannt
nöd nu i üsem Dorf, nei au im ganze Land
er hät Erfolg im Bruef und i dä Politik
isch riich und gsund, nöd z'gross nöd z'chli
nöd z'dünn und au nöd z'dick
hät ä liebi Frau und gschidi Chind und denkt liberal
setzt sich aber au för d'Umwelt i und isch sozial
letschti lauft er am'ne Buurehof vorbi
do chunnt dä Hund vo hene und bisst en grad is Chnüü

Au! das tut weh
das tuet chaibe weh
ojemine! ojemine!

än tragische Fall, s'chönnt jedem vo üs passiere än tragische Fall, do chunnt mer is
philosophiere

d'Nochricht vo däm fatale Biss isch schnell umecho
öber d'Zitig, s'Fernseh und au s'Radio
i allne Diskussione isch mer einer Meinig gsi
än Hund wo so'nen guete Ma bisst muess tollwüetig si
so hät mer müese Angscht ha um däm guete Ma sis Läbe
än Ufschrei isch dur's Land und alt händ en wöle pfläge

än Ozean
voll vo Anteilnahm
und so spontan

än tragische Fall...

i cha eu jetzt beruhige, dä guet Ma isch wieder gsun so muess es si
s'isch andersch usecho, gschtorbe isch dä Hund
i merke scho ehr denket genau s'Gliiche wien'i
öppis a däm guete Ma muess giftig si
jo, so muess es si
so tüscht dä Schii
än tragische Fall...

Sonntigmorge
S'isch Sonntigmorge föfi gsi
ä klari Sommernacht
i cha nüme schlofe
öppis hät mi ufgregt gmacht

i luege usem Fenschter
und denke vor mi hi
i mag mi nöd beruhige
doch uf eimol chunnt mer ä gueti Idee

i lege mini Kleider a
und gange usem Hus
s'isch chälter als i gmeint ha
d'Schtrosselampe gönd grad us

ä Wohltat för mini Sinn
ä Wohltat för mini Seel
lääri Schtrosse, klari Luft
wie fescht han'i mi do deno gsehnt

dänn lauf i die erscht bescht Schtross deruf
än Drögeler chunnt durab
er suecht noch'me Plätzli
i däre zivilisierte Schtadt

dor dä Wald und öber d'Wiese
sind sie ächt no gsund?
i mag jetzt nöd dra denke
i däre Sonntigmorgeschtund

immer wiiter ufe
s'blibt nüme so vill Zit
i chume recht is Schnufe
mit mine lange, schnelle Schritt

endlich uf dä Höchi
jetzt bin i parat
i gsieh d'Berge im Oschte
und under mir die schlofend Schtadt

do bin'i und do blib'i
so lang bis d'Sonne chunnt
i ha so chalt
Sonne, warmi Sonne chomm!
chomm jetzt, bitte chomm
chomm jetzt, bitte chomm
sie chunnt
sie chunnt...

Säg mer Din Name
Säg mer Din Name
und woher Du chunsch
säg wo gosch Du ane
bin'i nöd i Dinere Gunscht?

wie häsch Du mi verschüttlet
und an Bode grüert
a mim Selbschtvertraue grüttlet
und mer dä Hals zuegschnüert

wie lang losch Du mi liide
ohni Zueversicht?
wenn brichsch Du Dis Schwiige
luegsch Du i mis Gsicht?

wenn losch Du Di erweiche
wenn losesch Du mer zue?
wenn gesch Du mer es Zeiche
oder häsch Du Wichtigers z'tue?

Du weisch min Name
und woher i chumm
Du weisch wo ane
dass i gang und au worum

i wett nöd wiiter fröge
sieh scho, dass Du so nüt seisch
was bliibt mer öbrig als z'vertraue
dass Du do bisch und mi traisch

än chline Gedanke
S'isch jetzt schon'es Zitli her
dass i di gseh ha vo wiit her
wie du döt gsesse bisch im Gräs
und immene Heftli blättret häsch
i ha grad denkt: das isch sie jetzt!
Ha mich i dini Nöchi gsetzt
und ha agfange fescht schtudiere
wien'ich es Gschpröch chönnt provoziere

bi no am öberlege gsi
do packsch du s'Züg id'Täsche n'i
und schicksch di a, mi scho z'verloh
bevor dass du mi kennt häsch z'go
jetzt oder nie! i bi verläge
mit'me rote Chopf di grad go fröge
irgend öppis ganz banals ...
öb du und ich und allefalls...

du häsch glached und denn gsait
es täg der wörkli schüli leid
es seg jetzt eifach so dass du
mösesch zum'ne Rendez-vous
i bi döt gschtande ziemli blöd
du bisch gange und häsch nöd
eimol zrugg gluegd häsch mer do
dä letschti Funke Hoffnig gno

Alles vorbi ... s'isch jo nu än chline Gedanke gsi...

wie das so isch i däm Läbe
dä erscht Versuech dä goht dänäbe
s'zweit Mol won'i di ha troffe
han'i nochher dörfe hoffe
so isch dä chli Gedanke no
bi üs zwei voll zum Durchbruch cho
mer sind inenand verschloffe
händ üs a dä Liebi bsoffe

zäme vo dä Welt abghobe
zom'ne flügende Teppich verwobe
hüt han'i mängrnol dä Verdacht
mer hebed döt die schönscht Zyt vom Läbe verbracht
irgendwann sind mer ufgschreckt
händ bim andere Fehler entdeckt
mer händ das dütlich gsait und z'letscht
hät's än rechte Krach abgsetzt

Alles vorbi ... s'isch jo nu än chline Gedanke gsi...

scho churz druf abe isch die Wunde
gheilt gsi, mer händ üs wieder gfunde
wieder anenand verlore
und üs ewigi Liebi gschwore
mer sind über Schtock und Schtei
immer zäme nie elai
i guete und i schlechte Zyte
häm'mer zäme glacht und glitte

doch wäg mängrer Chlinigkeit
häm'mer üs wüeschti Sache gsait
und wenn i ganz ehrlich bi
meischtens bin'i dä erschti gsi
mer händ üs immer wieder versöhnt
doch langsam a dä Zueschtand gwöhnt
was isch vo all dem Schöne blibe
häm'mer üs gfrogt und händ glich gschwige

Alles vorbi ... s'isch jo nu än chline Gedanke gsi...

dänn häm'mer öber alles gredt
am Tag und au no Znacht im Bett
mer sind uf dä Berg uegange
händ üs s'erscht Mol tüüf verschtande
mer händ die Gluet nomol entfacht
und es grosses Füür drus gmacht
doch mer wössed hüt, dass es nöd goht
wenn mer's eifach brenne loht

ab und zue äs Holzschitt dri
eimol du und eimol i
nöd z'nöch und au nöd z'wiit entferne
denn chöm'mer üs no lang dra wärme
doch eis vo üs zwei wird denn wohl
als erschts die Welt verloh emol
s'ander wird fescht truurig si
und fröge: isch es jetzt vorbi?

Alles vorbi ... s'isch jo nu än chline Gedanke gsi...

Wiehnacht
Hüt git's öberzit
denn scho bald isch es sowiit
s'goht uf Wiehnacht zue
im Lade isch vill los
d'Erwartige sind gross
und ali händ än Huufe z'tue

s'isch ä Zit wo mer vill schenkt
und ufpasst, dass mer a ali denkt
s'Wiehnachtssortiment isch sehr individuell
und bsunders originell
will jo d'Lüt scho alles händ

bald isch Wiehnacht...

d'Schaufenschter sind verziert
und im Lade ine wird kassiert
d'Schpannig schtiigt
d'Lüt sind nervös
und mängmol äs bitzli bös
und denket: wär's doch scho vorbi

bald isch Wiehnacht...

wieder än Tag vorbi
bisch am End mit dinere Energie
dänn leisch dä Mantel a
im Schpiegel gsiesch dis Gsicht
wo anere Maske gliicht
gell, möchtsch wieder emol Wiehnacht ha