1. Konstanz
2. Mer Beidi
3. Glashuus
4. Din Name
5. Wieder Wiiter
6. November
7. Fidirii
8. Schliimer
9. Ä Gänseblüemli
10. Träumer
11. Abklatsch

Konstanz
vom alte Velo bis zum Rolls Royce
bruchts nu ä Fünkli Fantasie
und s'isch nu än Millimeter
vom Volltrottel bis zum Genie
nimm's doch nöd so schwer
s' chunnt än Bär
vo Konstanz her
vom Enteteich bis zum Mittelmeer
isch es nu chli guete Wille
us dim lahme Typ wird än Traummaa
muesch bloss echli schiele
nimm's doch nöd so schwer
s' chunnt än Bär
vo Konstanz her
än Chaugummi chläbt am Strosserand
und alli Auto fahred dra vorbi
aber zwösched äme Chaugummi und dir
bestoht denn glich no än Unterschied
nimm's doch nöd so schwer
s' chunnt än Bär
vo Konstanz her
was will er?
di am Buucheli neh

Mer beidi
min Finger uf dim Nasespitz
chunnt abe uf ä chlini Alp
wandret denn dor äs Tal
und landet zletscht do im Mittelland
din Buuch macht die gliiche Grüüsch
wie dä Heizkörper näbedra
du seisch irgend öppis
aber i verschtoh's nöd richtig
trotzdem gib i Antwort
und i bi fascht sicher
du verschtohsch es au nöd
und s'isch au nöd äso wichtig
wenn zwei hungrigi Seele am Fresse sind
vo ganz wiit us em All
schint dä Mond is Zimmer ine
nei s'isch nu ä Strosselampe
wo chli gueti Mine macht
vo onenue tönt dä Fernseh ziemlich luut
und i schriebe mit em Finger das Gedicht uf dini Huut:
mer beidi händ kei Zuekunft
und au kei Vergangeheit
mer beidi sind ä Wolke am Himmel
gmacht för'd Ewigkeit

Glashuus
i hocke i däm Stuehl wo du unbedingt wöle häsch
und find än jetzt eigentlich no bequem
und das Bild vo dem Pseudokünstler a dä Wand
isch nüme würkli äs Problem
s'goht alles äso gschwind
i chume immer z'spot
i sitze do im Glashuus
und dusse goht dä Wind
dini Jacke häsch vergesse
die liit natürli wieder mol uf em Kanapee
früehner hets mi ufgregt
und jetzt find i's irgendwie no schö
s'goht alles äso gschwind
i chume immer z'spot
i sitze do im Glashuus
und dusse goht dä Wind
d'Töre häsch au no offe lo
ziemli typisch muen i säge aber i mach sie jetzt glich nöd zue
äs bitzli frischi Luft do ine cha nöd schade
mim Chopf jedefalls tuet's no guet
s'goht alles äso gschwind
i mine Auge häts no Sand
und i wör so gern
mit em Grind dor d'Wand
i hocke i däm Stuehl wo du unbedingt wöle häsch
und find än jetzt eigentlich no bequem

Din Name
i ha din Name i mim Garte vergrabe
doch dä Köter vo mim Nochbur
hät än wieder usbudlet
und mer vor d'Tör hereglait
i ha din Name uf ere Autobahnraststätt usgsetzt
Aber drü Tag spöter
isch er wieder verhudlet und vertschudlet
vor min're Tör gschtande
i ha din Name i mim Ofe verbrennt
und bi go Fernseh luege
aber scho am nögschte Morge hät än dä Wind
wieder a mis Fenschter heretrait
denn han i d'Buechstabe vo dim Name umgstellt
bis än anders Wort drus worde isch
das hät sowit ganz guet funktioniert
bis i denn gmerkt ha
dass i nüme ha chöne
Zitig läse

Wieder wiiter
i han ä bluetigi Nase und d'Brille verboge
us minnere Seel goht nu no äs Räuchli uf
und i bi scho i dä Höll une gsi
und dur d'Autowäschaalag eifach ohni Auto
und i ha gwartet bis mer endlich öppert sait es seg vorbi
s'goht wieder wiiter
i weiss nöd wie wiit
s'goht wider wiiter
i weiss nöd wele Weg
und i bi sicher au eine wo gern uf äm Ranze liit
aber nöd wenn er vorher vo so wiit
obenabe gheit isch
und Rot isch sicher au ä schöni Farb
villicht sogar die schönscht
aber nöd wenn sie us minnere Nase rünnt
und i ha gwartet bis mer endlich öppert sait es seg vorbi
s'goht wieder wiiter
i weiss nöd wie wiit
s'goht wider wiiter
i weiss nöd wele Weg
und i bi sicher au eine wo gern Sterne hät
aber nöd wenn er eifach nu no Sternli gseht
und mer isch scho lang klar dass es Schiissdreck git
aber nöd wieso dass mer dä immer a mine Händ chläbt
und i ha gwartet bis mer endlich öppert sait es seg vorbi
s'goht wieder wiiter
i weiss nöd wie wiit
s'goht wider wiiter
i weiss nöd wele Weg

November
i ha gern än Stei im Schueh
und bim Rasiere zwei Tropfe Bluet
i ha gern zwölf Muggestich
und ab und zue än Schlag vo der is Gsicht
denn chan i so schö liide
im'ne dunkle See
denn lon i mi so schö triibe
und s'tuet so schö weh
i ha gern wenn's November isch
und wenn's regnet und näbled
und nislet und fislet und grüsled
i ha gern wenn mini Chatz ä Muus killt
aber vorher no chli mit ehre spielt
i ha gern ä schlechti Welt
und wenn's Volk die Schlechte wählt
denn chan i so schö liide
im'ne dunkle See
denn lon i mi so schö triibe
und s'tuet so schö weh
i ha gern wenn's November isch
und wenn's regnet und näbled
und nislet und fislet und grüsled

Fidiri
ade bin i loschtig gsi
und han i bi der glüte
oh du liebs ängeli
wotsch du mer das verbüte?
es Burebüebli magsch du nid
das gsieht mer der wohl a
fidiri fidira fidirallallallalla
mer chönnte doch zwöi Liebi si
im Aargou oder so
Meiteli wenn du witt go tanze
chumm du dä Gitarre na
Margritli i lieb di
vo Häärze mit Schmäärze
s'isch mer aues ei Ding
drum lieb i di so ring
fidiri fidira fidirallalla
fidiri fidira fidirallallai bi nid dr Schacher Seppeli
u ou nid so bekannt
aber du bisch ou nid s'Vogelliesi
vom Bärner Oberland
säg wotsch du eifach z'Märit ga
und mi ellei diheime lah?
fidiri fidira fidirallallallalla
fidiri fidira fidirallalla
fidiri fidira fidirallalla
Stägeli uf Stägeli ab juhee
d'Froue si äs Lumpepack
nach em Räge schint Sunne
nach em Briegge wird glacht
ja s'isch ja nu es Träumli gsi
Träumli gö so schnäu verbi
fidiri fidira fidirallallallalla
fidiri fidira fidirallalla
fidiri fidira fidirallalla
fidiri fidira fidirallalla
fidiri fidira fidirallallallalla

Schliimer
über än schlechte Witz lache choschtet nüt
und löst glich mängmol äs Problem
oder villicht echli lächle
oder wenn's si mue chli schwächle
eifach so je nochdem
ab und zue uf dä Rogge ligge
und alli Vier vo sich strecke
und denn mit em Schwänzli wädle
und denn Freud ha amne Rädli Wurscht
ab und zue ä Spürli Schliim
isch absolut legitiim
do bisch du no lang kein Schliimer
anderi sind do no viel schliimer
ä falsches Kompliment zur rechte Ziit
tuet eim öppen es Törli uf
und wenn's Arschloch scho mol offen isch
muesch ineschlüüfe und chli hüüchle
ab und zue ä Spürli Schliim
isch absolut legitiim
do bisch du no lang kein Schliimer
anderi sind do no viel schliimer
okay me sött scho sini Grundsätz ha
aber au döt muess es Usnahme geh
s'isch mängmol gschider sini Grundsätz
oder au än liebe Fründ z'verroote
glaub mer das verstoht dä
ab und zue ä Spürli Schliim
isch absolut legitiim
do bisch du no lang kein Schliimer
anderi sind do no viel schliimer
no viel schliiiimer
no viel schliiiiiiiimer

Ä Gänseblüemli
s'isch eine dä bescht Fuessballer uf dä Welt
aber er hät no nie Fuessball gschpilt
nöd uszdenke wie guet er wär
niemert weiss es
vorallem nöd er
s'isch eini die schönscht Frau uf dä Welt
aber sie lached nie oder nu chli quält
nöd uszdenke wie schö sie chönnt si
niemert weiss es
vor allem nöd sie
s'isch eine dä gröscht Dichter uf dä Welt
aber er hät no nie ä Gschicht verzellt
nöd uszdenke wie genial er wär
niemert weiss es
vor allem nöd er
s'isch eine dä lieb Gott uf dä Welt
aber er hät no nie lieb Gott gschpilt
nöd uszdenke wie gerecht er wär
alli wössed's
aber nöd er
ä Gänseblüemli hät en Traum
es seg än grosse Gänsebaum
nöd uszdenke dä Traum wird wohr
wer weiss
villicht in äs paar Johr

Träumer
du bisch so lieb so zart so schö
dini Hand i min're Hand macht mi nervös
am grosse Zeche han i Hüenerhuut
hey mer sind doch do nöd z'Hollywood
wo liit do dä Hund begrabe?
wenn ghait mer dä Zwanzger abe?
han immer gmeint i seg nöd blöd
än Träumer jedefalls bin i nöd
d'Berge schtönd do wie im'ne Prospekt
s'isch warm und glich isch öppis suspekt
mer beidi i däm ideale Gländ
das chunnt nöd guet das git keis Happy End
wo liit do dä Hund begrabe?
wenn ghait mer dä Zwanzger abe?
han immer gmeint i seg nöd blöd
än Träumer jedefalls bin i nöd
mer schlofed ufere Bluemewiese i
i träume mer beidi hebed Striit
denn wach i uf und han ä rechti Wuet
du bisch weg und s'regnet und alles isch guet
wo liit do dä Hund begrabe?
wenn ghait mer dä Zwanzger abe?
han immer gmeint i seg nöd blöd
än Träumer jedefalls bin i nöd