zurück zur Diskographie

Tschaued än anders mol Tschaued, än anders Mol, 1981

Wolfgang Egli: Gesang, Tasten, Gitarre
Daniel Weniger: Gesang, Bass
Hansruedi Geel: Saxophon, Klarinette, Trompete
Alexander Egli: Schlagzeug

01 Wie wenn i grad gebore wär
02 Tschugger
03 I bi froh dass Di git
04 Erinnerige
05 Güggel
06 He Du
07 Nöd sicher
08 Tschaued, än anders Mol


Wie wenn i grad gebore wär
I wött nüme hei, jetzt weiss i, wien'i läbe möcht
Do fühl i mi so frei, ohni Zwang wo mi verdruggt
Jetzt weiss i wer i bi

Do verlangt mer nüt vo mer, Menschlichkeit nu - und es bitzli
Fröhlichkeit und schwer, isch das nöd bi dene Lüt,
do fühl i mi so wohl

Do isch mer so zu mer, wie wenn i grad gebore wär,
Do ninnt mer mi so wien'i bi, Vorurteil hännd's nöd öber mi

Do spiel i kei Theater, um dä z'si wo die andre wönd,
Do bruuch i kei Fassade, dass niemert i mich ine gsieht
und merkt wie'i mi fühl

Do muen'i nöd so tue, als ob mer nüt a d'Niere gieng
und ich mini Rueh, bewahre chönnt i jedre Läbeslag

Tschugger
Sie hät scho sit Johre eres Herz verlore
a sonen Schnugger vomene Tschugger
Er sorgt för Rueh und Ornig i Sanggalle
und duet däbi no allne Fraue gfalle
wenn er umenand stolziert i sinere schigge Uniform

I de blaue Zone sim Jagdrevier
wenn do ein falsch parked, verjaggt's en schier
ussert s'seg e hübschi Frau e netti
und lehnt si zunem here und macht Bitti-Bätti
dänn schmunzlet er ganz süess und druckt denn
beidi Auge zue

Wie macht er das bloss, er isch so gross
er isch so schlank und doch nie chrank
er isch e sonen richtige Maa
en Maa, genau so wien'en jedi Frau möcht ha
er weiss das selber ganz genau, denn er isch schlau

Doch leider git's do e Politesse
wo mä am beschte wieder tuet vergesse
und wo die ganz Stadt devo chönnt esse
Mit dere muess er ufs Standesamt marschiere
will sie en ertappt hät bim falsch parkiere...

I bi froh dass Di git
S'gäb för si au hüt, eifach immer no nüt
schöners als mit mer, z'spaziere Hand in Hand,
öbers Land

So wie mer's denn, i de Filme gsieht
es Päärli wie im Märli, so chunnt's üs mängmol vor
doch s'isch wohr

Es isch bi Gott, wie imne Werbespot
mer hüpfet öber frischi Wiese, gänd denand en sanfte Chuss,
chunnsch drus

I het's nöd denkt, dass es so wiit chunnt
dass i, praktisch jedi Stund
cha Freud dra ha, wenn i a öppert denke cha

I ghöre di vo fern, du seisch, du hegsch mi gern
Noch all dere Ziit, i bi froh, dass di git

Erinnerige
Du hesch en freie Nomitag, und du weisch nöd wa
du mache söllsch, es macht di gar nüt a
Dusse isch wüescht Wetter, spilsch eifach e Kassette
Und liisch debi ufs Bett - und denksch no...

Uf eimol horchsch du uf, du ghörsch e Melodie
e Melodie vo früener, s'stimmt di ganz druf i
Si entführt di ine Welt, du hesch nüme dra denkt gha
doch uf eimol isch si wieder do

Du fühlsch eso, gsesch alles vor der, genau wie do
s'goht der scho echli no, die alti Ziit, brennt liechterloh

D'Kassette isch scho fertig, du träumsch immer no
Doch langsam wachsch du uf, (du merksch:) bisch wieder do
denksch no eimol zrugg, no en flüchtige Gedanke
denn lächlesch, doch es bitzli bisch scho truurig

Güggel
Es git i üsre Stadt, en Maa wo's schwer hät
D'Lüt säged nu dä spinnt, will er s'Läbe andersch ninnt
Er macht nöd das was di andre mached,
er lacht nöd denn wenn di andre lached

Si säged em Güggel, dem alte Maa
sie säged em Güggel, will er sich nöd wehre cha

Lueg en a, wien' er dai stoht
Gang doch zuen' em, frög wie's em goht
viellicht häsch du au öppis devo

Er passt nöd i die Ziit, er macht kei Mode mit
För en kreist nöd die ganzi Welt,
um Selbstverwirklichung und Geld
und trotzdem bruucht er kein Psychiater
um sis Problem macht er keis Theater

Und trotzdem isch er so elai
fass doch Muet, gang zuen' em hei
Viellicht häsch du au öppis devo

He Du
He Du, was luegsch du mi so a
lo das bitte si, denn i, i kenne mi
He Du, du weisch nöd, was do machsch
wenn'd so fründlich lachsch
denn weiss i nüme was tue

Du sitzisch do, vis à vis vo mer im Tram
Du luegsch mi a, i ha s'Gfühl, i kenn di scho lang
I gseh's cho, i cha nöd sitze bliibe
I wer mit der am gliche Ort usschtiige

He Du, i lauf hinder der her
und s'fallt mer doch so schwer
zum eifach öppis z'säge
oh Du, was söll i denn nu mache
du wersch bestimmt nu lache, und den wiiter go

Du weisch nöd, wie's um mi stoht
Du weisch nöd, wie's i mim Herz zuegoht

Gsehsch du denn nöd wien i mi quäl
und nöd weiss, was i söll, helf mer doch echli
Findsch du das richtig, wie du mi
gfange häsch und jetzt losch mi eifach si

Tschau du, d'Tür goht hinder der zue
i bliib eileige stoh und s'loht mer doch kei Rueh
He Du, du weisch nöd, was do machsch
viellicht wersch du au mol so elai, vor ere Türe stoh...

Nöd sicher
I weiss no won' i, ganz en Chline gsi bi
I ha mi wohl gfühlt und geborge
ha mi gfreut uf jede Morge
I ha di ganz Welt eso klar gseh
Ha gwüsst was guet und bös isch und
was es nöd dörf geh

I weiss no won'i, ganz en Chline gsi bi
min Bape, de gschid Maa
hät uf jedi Frog en Antwort gha
Wenn i gfröget ha woher chumm denn i
hät er gseit vom liebe Gott
und i bi z'friede gsi

I weiss no won' i, denn grösser worde bi
i ha zwiiflet a de Welt
ha mer schweri Froge gstellt
Jo es hät mi so verwirrt
ha nüme gwüsst woher dass i chumm
und was no wird

I ha denkt, es chönn nöd si, das i der einzig bi
und i ha i minere Not
gluegt wie's denn de andre goht
I ha gseh, sgit i dem grosse Labyrinth
no viel me Lüt wo gnau so wien' i
nöd sicher sind

Doch wieviel devo, sind in Panik cho
si händ gsuecht noch me Halt
bin're Sucht, bin're Lehr oder irgend're Gstalt
si händ wieder wöle gnau wie do
wie wos chli gsi sind, die Welt
und eren Sinn genau verstoh

Doch i bi immer no, nöd sicher gnau wie do
I weiss immer no nöd
weli Antworte und weli Weg
die richtige sind uf dere Welt
Doch denked nöd dass i
verzwiefle, denn en Halt gits au för mi
I bi sicher, dass i nöd sicher bi

Tschaued, än anders Mol
Mer müend jetzt wieder go
mer hoffed Er händ Freud dra gha
a üsre Musig, a üsem Spiel
Mer gsehnd üs sicher wieder emol
bis denn mached's guet und läbed wohl
zum Abschied no, das chline Lied

Tschaued än anders Mol
mached's guet und läbed wohl
gönd zrugg i euri chlini Welt
Tschaued uf Wiederseh
eimol wird's es wieder geh
dass mer zäme chönd

Losed guet die Melodie
sie mögi euri Begleiterin sie
wenn Er jetzt do use gönd
Summed si vor eu he
tüend si andere wiiter geh
Jo - und das wär's denn scho gsi