zurück zur Diskographie

nüt nüt, 2003

Wolfgang Egli: Gesang, Wurlitzer, Fender Rhodes, E-Gitarre
Daniel Weniger: Bass, Gesang
Michael Duss: E-Gitarre
Michael Spörri: Hammond
Alexander Egli: Schlagzeug

01 Schlamm
02 Mexico
03 Böni
04 Goldfisch
05 Pfirma
06 nüt
07 Apero
08 Hund
09 Ziit
10 Lisa
11 Charä
12 Missverständnis
13 Böni Nr. 9

Schlamm
scho als Chind han i dä Muetter mol an Franke gschtohle
und gsait i heben gfunde
ha im Nochbur sim Cheller Citro gsoffe
und sini Chatz am Schwanz abunde
i gange immer wieder bi Rot über d'Stross
wa isch enard mit mer los?
i dä Migros han i scho mol zwei Stutz zvill usen öbercho und nüt gsait
i cha so richtig grüsig lache
wenn ein blöd uf d'Schnorre gheit
i dänke mängmol a blutti Fraue
mängmol so richtig fescht
i esse gern toti Saue
am liebschte am Chinderfescht
hey Lüt, wer rettet mi ...
i ha mi scho me als eimol öberfresse
und rede gern mit vollem Muul
überhaupt nehm i s'Muul mängmol chli voll
i tue gern vorusse brünzle
wenn's si muess im Swimming Pool
und wenn GC uf dä Ranze öberchunnt denn find i's cool
hey Lüt, wer rettet mi...
i ha scho gsait i heb schö Wetter gha, däbi häts gär nöd gschtumme
i denke mängmol schlecht öber anderi Mensche
vorallem öber die dumme
vorallem redi viel z'direkt
und zu allem Elend i Sangallerdialekt
hey Lüt wer rettet mi
us all dem Schlamm
us däre Pfütze?
wer get mer ä Stütze
ä Krücke
ä Perücke?
wo isch dä Rettigsgurt?
dä Rettigsanker?
dä Rettigswage?
dä Rettigstanker?
dä Rettigsschrage?
wer get mer der rettend Kuss?
dä finale Rettigsschuss?

Mexico
tüüf im Buuch vom'ne dicke Fisch
sitz i ganz ellai am'ne chline Tisch
öber mer d'Venus
und onder mer d'Jungfrau
und hinder mer d'Sonne,
wo scho lang under gange isch
gesse han i viel und gär nöd so schlecht
aber vergesse han i di no nöd so recht
än Monet isch kei langi Ziit
und Mexico isch nöd so wiit ewägg
wartesch du ächt uf mi?
Turbulenze im Kopf und im Buuch
und jetzt dä Kommentar vom Kapitän:
Züri heg 5 Grad onder Null
und Nebel hegs vo Genf bis Sangalle
i söll mi jetzt aschnalle

Böni
dä Böni i dä Südsee
muen i das jetzt wieder gseh?
i dä Schwizer Illustrierte
bim Pausetee
dä Böni i dä Berge
bi Sonne und Pulverschnee
zwei Siite witer hinä
muen i das jetzt wieder gseh?
dä Böni uf Mallorca
baare Buuch
und i früür mer do dä Arsch ab
und s'Schliifpapier isch ruuch
i wär gern dä Böni
dä liit jetzt uf dä fuule Huut
und i schaffe
mi do halbe kaputt
er hät ä Wöhli
i dä Höhli und i
bin än Lööli
und lauf am Tag hinedri
dä Böni uf Visite
i sinnere Fabrik
i gsehn' ehn vo wiitem
än Augeblick
dä Böni als Experte
a dä Universität
und alii Lüt klatsched
wenn's no bi mer au mol so tät
dä Böni hät ä schöni Fründin
und än schöne Porschee au
und i wäsche dä Mercedes
vo sinnere Frau
i wär gern dä Böni
dä liit jetzt uf dä fuule Huut
und i schaffe
mi do halbe kaputt
er hät ä Wöhli
i dä Höhli und i
bin än Lööli
und lauf am Tag hinedri
endlich halbi sechsi
endlich isch Schluss
i dänk an ä chalts Bierli
und stiig us em Bus
endlich ä Ziitig
und wa muen i do gseh
dä Böni heb sich geschter
zobig d'Chugle geh
i wär gern dä Böni
dä liit jetzt uf dä fuule Huut
und i schaffe
mi do halbe kaputt
er hät ä Wöhli
i dä Höhli und i
bin än Lööli
und lauf am Tag hinedri

Goldfisch
Dä Himmel ändret sich 100 Mol am Tag
nu do une ändret sich nöd viel
oder besser gsait: s'ändret sich fascht alles
aber eifach nöd da, won'i will
ä Telefon vo der wär min gröschte Wunsch
aber i wösst jo glich nöd wa säge
und wenn du mer uf em Trottoir entgege chunnsch
denn lueg i ue zum Himmel und wart uf dä Räge
min Goldfisch lueged jeden Obig Fernseh
und i ha mini Flosse uf em Tisch
i weiss genau, er wör's no gern gseh
wenn en frei loh wör
aber weisch wa?
dä söll no bliibe won'er isch

Pfirma
dä Lehmann hät zur Firma ghört wie dä Dom zur Stadt
Pfirma isch dä Zirkus gsi und dä Lehmann dä Akrobat
Salti hät er gschlage und uf em Hochseil balanciert
Füür hät er gschpaiit und Leue dressiert
dä Lehmann isch äs Liecht gsi i dä Nacht
und d'Nacht händ alli gern mit ehm verbrocht
er hät alles geh und er hät alles gno
aber noch'me föhnige Tag händs en
geschter Znacht entloh
er hät alles geh
und er hät alles gnoh
ä Hypothek, ä falschi Strategie
dä Lehmann seg för Pfirma nüme tragbar gsi
au menschlich heb er's nöd so brocht, heb alli glingged
heb onenufe gschlägged und vo obenabe gingged
ä Hypothek
ä falschi Strategie
isch nüme tragbar gsi
s'muess immer dä plogedi Hansli si
damol isch's jetzt nu dä Lehmann gsi
aber s'nögscht Mol isch es dä und dänn dä sääb und dänn i
und dänn Europa, d'Welt und dänn die ganz Galaxie
hüt isch's dä Lehmann
und dänn dä sääb und dänn i
und dänn Europa, d'Welt
und die ganz Galaxie

Nüt
mer sitzed üs beidi vis à vis
und tüend wie wenn nüt wär
däbi isch au wörkli nüt
aber nüt isch mängmol schwär
mer wöred gern öber öppis rede
s'wär jo au langsam Ziit
aber wil's nüt git zom rede
denn redet mer halt öber nüt
mer wöred gern öppis ghöre
wo üs öppis dra liit
aber wil's nüt git zom ghöre
denn ghöred mer halt äbe nüt
jetzt sind mer doch för nüt
und nomol nüt do zämecho
logisch vo nüt chunnt nüt
s'isch jo au gär niemert do

Apéro
jetzt schtömmer scho wieder alli zäme
und strahled üs a wie Plutonium
stossed a uf's Endi vo dä Welt
und lached echli dumm
mer ligged üs echli uf em Mage
und schtönd üs uf dä Seel
niemert weiss so recht wa säge
und glich schnorred alli uf Befehl
i ghöre soviel Saich rundume
und s'chunnt soviel Saich us mim Muul
händ denn alli sonä volli Blose?
liits am Föhn oder am Alkohol?
Muemer do zerscht im Komma ligge
muess wörkli z'erscht ein öber Bord
häts do eigentlich kei Samariter
wo eim s'Muul zue tüend und en Schtöpsel is Ohr
jetzt müesst än Rettigshelikopter cho
häts do än Landeplatz irgendwo?

Hund
i üsem Dorf do läbt än Ma, dä isch bekannt
nöd nu i üsem Dorf, nei au im ganze Land
er hät Erfolg im Bruef und i dä Politik
isch riich und gsond, nöd z'gross nöd z'chli
nöd z'dünn und au nöd z'dick
hät ä liebi Frau und gschidi Chind und denkt liberal
setzt sich aber au för d'Umwelt i und isch sozial
letschti lauft er am'ne Buurehof vorbi
do chunnt dä Hund vo hene und bisst en grad is Chnüü
au! das tuet weh
das tuet chaibe weh
ojeminee!
d'Nochricht vo däm fatale Biss isch schnell umecho
öber d'Zitig, s'Fernseh und au s'Radio
i allne Diskussione isch mer einer Meinig gsi
än Hund wo so'nen guete Ma bisst, muess tollwüetig si
so hät mer müese Angscht ha um däm guete Ma sis Läbe
än Ufschrei isch dur's Land und alli händ en wöle pfläge
än Ozean
voll vo Anteilnahm
und so spontan
i cha eu jetzt beruhige, dä guet Ma isch wieder gsund
s'isch andersch usecho, gschtorbe isch dä Hund
i merke scho, ehr denket genau s'Gliiche wien'i
öppis a däm guete Ma muess giftig si
jo, so muess es si
jo so tüscht dä Schii

Ziit
s'isch mol eine gsi
dä hät immer gsait, wemmer en gfröget hät
i ha kei Ziit
und sini Fründe und sini Frau händ gmeint
das seisch du jo nu so
chomm doch au
und dä Husarzt hät nu gmeint
mached sie ä Therapie
aber er hät nöd lang öberlait und dänn gsait
i ha kei Ziit
und au dä Pfarrer mit sim Rat hät gmeint
för d'Umkehr segs nie z'spot
aber er hät gfunde, das seg em z'wiit
er heb kei Ziit
und gli druf abe isch er do under än Auto cho
und sie händ en is Grab ie glait
und d'Lüt händ noch em Esse gsait
jetzt hät er jo glich recht gha dä Ma
er hät kei Ziit meh gha

Lisa
jetzt hockets wieder zäme öber ehrem Projekt
d'Bauherrschaft und dä Architekt
sie diskutieret hin und her
öber Ziegel, Beton, Holz und Teer
dä Architekt zeichnet wie wild
er weiss bald selber nüme, wele Strich dass gilt
s'isch immer schö, wemmer öppis cha plane
s'git Arbet för dä Bagger und dä Chrane
zur gliche Ziit hockt ä Chueh uf däre Wiese
hät dä Friede im Buuch und weiss vo nüt
ehren Name isch
Lisa
s'git ä feini s'git ä gueti Sach
vom Fundament bis ue is Dach
d'Baufirma hät günschtig offeriert
wenn alles rund lauft, wird morn visiert
dä Hueber vo dä UBS hät gsait sie mached mit
s'sig alles OK mit äm Baukredit
dä Gmeindamma hät geschter telefoniert
Parkplätz bruchs no meh, denn segs akzepiert
zur gliche Ziit hockt ä Chueh uf däre Wiese
hät dä Friede im Buuch und weiss vo nüt
ehren Name isch
Lisa
nüme lang do schtönds döt, ei Frau und zäh Manne
im Hindergrund isch dä Bagger und dä Chrane
alli grinsed ganz entspannt id Kamera
händ än Spate i dä Hand und äs Helmli a
s'isch klar, dass sonä Foti id Ziitig mue
doch bis es sowit isch, gits no chli z'tue
Telefon und Telefax laufed heiss
doch jetzt macheds Pause und suufed eis
zur gliche Ziit hockt ä Chueh uf däre Wiese
hät dä Friede im Buuch und weiss vo nüt
ehren Name isch
Lisa
mängmol chumm i mer genau so vor wie d'Lisa
hocke irgendwo blöd uf dä Wiese
und zur gliche Ziit sind es paar Herre mit Dame
irgend öppis cheibs am plane
villicht planeds bloss än Bau
villicht aber au meh
villicht än StellenabBau oder äs AKW
villicht än genmanipulierte Mensch
oder än Chrieg
wo'd besser nöd dra denksch
und mer wössed nüt
und ehr losed zue
und ich sing äs Lied
vonnere
Chueh

Charä
i bi eine wo zmitzt im Läbe stoht
eine wo weiss wo's döregoht
i ha scho mänge Charä kauft
i weiss langsam, wie dä Charä lauft
mer macht niemert öppis vor
scho gar nöd äs U för äs A
i weiss mittlerwil
dass mer im Läbe nüt cha gratis ha
i bi eine wo zmitzt im Räge stoht
und wenn's Wasser stiigt nöd under goht
i schwimm immer obenuf
und wenn anderi versuufed, han i no ganz lang Schnuuf
i nimm wan i cha und wan i nöd cha
dem truur i nöd lang no
i ha glernt dä Chrage ufe z'schloh
und wieder wiiter z'goh
i bi eine wo zmitzt im Läbe stoht
eine wo sich uf nüt verloht
i bruch nu no dä allerletscht Schliff
denn han i s'Läbe total im Griff