zurück zur Diskographie

Glashuus Fälesee, 2000

Wolfgang Egli: Gesang, Gitarren, Piano, Keyboard
Daniel Weniger: Bass, Gesang, E-Gitarre
Alexander Egli: Schlagzeug
Charlotte Weniger: Bariton- und Tenorsaxophon
Silvio Wyer: Alt- und Sopransaxophon
Theodor Jost: Trompete, Flugelhorn
Peter Wenig: Tuba

01 Spaghetti
02 Peter
03 Intro
04 Fälesee
05 Elisabeth
06 SanGalle
07 Irgendwenn
08 Hardy
09 Binödi
10 Sofa
11 Roti Rose

Spaghetti
i hocke wien än Hund vor din're Töre
i weiss genau du bisch do drin, chomm vöre
gescht häsch gsait i söll emol vorbi cho und jetzt machsch Chopfsolot us mer

i ha di gern i bi so blöd i ha di gern und weiss nöd wieso

geschter no häsch gsait i seg än Liebä und hüt machsch Spaghetti us mer
geschter no ha der gholfe zügle und hüt machsch Tomatepüree us mer

chomm leg mi eis um s'ander i din Teller und uf dini Gable,
nimm mi mit dä Zunge i dis Muul und schluck mi abe und heb mi gern
chomm heb mi gern bis doch au so blöd isch doch glich wieso

Peter
d'Zitig vo hüt bruchsch morn am beschte zum s'Füür azünde oder dä Meersau mischte
was hüt no guet isch, chasch morn wegschmeisse
no dä Peter hüetet immer no sini Geisse

d'Vroni han i ghört sig nüme mit em Toni, sie heb jetzt än andere aber er seg no ohni
was hüt Vroni heisst cha morn Gabi heisse
no dä Peter hüetet immer no sini Geisse

dä Walter hät för s'Alter echli Geld uf dä Bank, hüt gohts am Geld guet aber dä Walter isch chrank
was hüt än guete Zug isch, cha morn entgleise
no dä Peter hüetet immer no sini Geisse

Letschti chunnt s'Heidi hei vo sine Reise und hät Luscht gha uf dä Peter und sini Geisse
im Dorf händ's gsait dä Peter seg uf Mexico
Gopfriedstutz chasch di hüt enard uf nüt meh verloh?

Fälesee
Wolke hanged wie Rauch us dä Höll, i laufe um dä See so schnell i cha
s'isch wie innere Kathedrale am'ne Gottesdienst im Mittelalter
mit Weihrauch, Rose-chranz und dunkle Gsäng und i laufe wie'ne Ratte dor die füechte Gäng
uf eimol dor dä Rauch än Sonnestrahl... dä Heilig Geist zum Obigmol
han öppis verlore am Fälesee jo du fälsch mer , wieso bin i öberhaupt do ufe mit der?

dä See glänzt wie Tafelsilber a dä Wänd hanged Heiligebilder
jo heiligi Dreifaltigkeit häsch au scho lang nüt meh gsait, luegsch wie s'Bogartemannli obenabe,
denksch am End no i heb än Schade
s'Kathedraledach isch nöd ganz dicht s'regnet obenabe mer direkt is Gsicht
han öppis verlore am Fälesee...

Wurzelfraueli schtömmer im Weg, eis stellt mer dä Hogge, i gheie uf d'Nase alles wird bru,
nöd no d'Hose vo z'oberscht bis z'underscht wien än Osterhase
jo Blitz und Donner Gopfriedstutz guet wär jetzt än Regeschutz
oder wenigstens ä Kaputze oder än heisse Kafi Luz
han öppis verlore am Fälesee...

dä See wird zom'ne dunkle Loch wie Lava wo döt one chocht, jetzt han i gnueg,
ha d'Schnauze voll, irgendwenn find au i's nüme so toll
jo alles verlürt emol sin Reiz au du mini Lieb, jetzt gang i zrugg i'd Beiz
und won'i döte d'Tör ufmache do gsehn'i di und du gsehsch mi und jetzt fangsch a lache
han öppis verlore am Fälesee...

Elisabeth
Elisabeth chomm mit mer echli id Stadt, roll mit mer dä Freudeberg durab,
morn isch villicht alles scho vorbi, jo s'muess jo nöd för immer si
was immer isch, isch nöd immer guet, lieber ä churzes Füür als ä langi Gluet,
dä Winter dä Chlotz chunnt zwor scho bald und mit äs bitzli Gluet wär's nöd so chalt
dä Früehlig sait mer, seg die schönschti Ziit, wenn alles tribt, trib i gern chli mit,
am liebschte, do trib i halt mit der, usgrechnet dänn gäb i di nöd gern her
i weiss die Hoffnig tönt chli unverschämt, aber klar, dass i dä Sommer au no nähmt,
i schwitz bi däre Hitz nöd gern elai, am liebschte im Duett und do bruchts zwei
Elisabeth chomm mit mer echli id Stadt, roll mit mer dä Freudeberg durab.
morn isch villicht alles scho vorbi, jo s'muess jo nöd för immer si

San Galle
häsch alli Segel dusse aber kei Wind · luegsch tüf in Ozean gsiesch nu din Grind
än Weiher wär doch gnueg tüf gsi · jo San Galle wartet uf di
Texas isch ä cheibe wiits Land · häsch s'Schtürrad vom'ne Chevy i dä Hand
aber tüf tüf i der isch es cheibe chli · jo San Galle wartete uf di

öberall scho häre und glich no niene gsi · immer witer weg vo dihai
d'Dosis immer grösser aber d'Wirkig ehner chli · weisch wa· San Galle wartet uf di!

oder laufsch dur Nairobi wien'äs Tier uf dä Suechi noch me chüehle Bier
jo s'dörft sogar no äs bitzli chüehler si · jo San Galle wartet uf di

öberall scho häre und glich no niene gsi...

oder luegsch dur d' Röhre laiv is Studio zwei · gsiesch interessanti Lüt, bisch nöd so elai
aber wenn's fertig sind, denn lacheds öber di
nu San Galle wartet uf di · nu San Galle wartet uf di

öberall scho häre und glich no niene gsi... she loves you yeah yeah yeah

Irgendwenn
Irgendwenn lueg i nüme dä Wolke zue, nehme d'Füess us em See und schlüf id Schueh,
irgendwenn isch fertig luschtig gsi
und dänn chauf i mer dä See und ä Schiff und ä Hus und än Berg mit Schnee,
irgendwenn scho aber nöd jetzt
irgendwenn wer'i Revolutionär, rette s'Läbe vom'ne Nasebär
irgendwenn do gründ i än AG, zwei Gool im Final mis Potenzal isch öberall,
irgendwenn scho aber nöd jetzt

irgendwenn do flüg i zu dä Sterne oder d'Sterne flüged zu mer
irgendwenn do chasch du mi gern ha - irgendwenn scho aber nöd jetzt

irgendwenn do schrieb i än Roman so wiit und tüüf wien'en Ozean
irgendwenn entdeck i ä neus Molekül
und dänn tuen i sexuell mit dä stolze Isabel, irgendwenn scho aber nöd jetzt
irgendwenn do flüg i zu dä Sterne oder d'Sterne flüged zu mer
irgendwenn do chasch du mi gern ha, irgendwenn scho aber nöd jetzt

irgendwenn lueg i nüme dä Wolke zue, nehme d'Füess us äm See und schlüf id Schueh,
irgendwenn isch fertig luschtig gsi, jo irgendwenn bim Obigrot strich mer d'Welt ufs Obigbrot,
irgendwenn scho aber nöd jetzt

Hardy
z'San Galle stoht ä Hus und i däm Hus ä Bett und i däm Bett schloft än kurlige Ma
heisse tuet er Hardy, i sim Ranze häts Bacardy,
er hät no alli Kleider a aber sött scho lang go schaffe go
geschter zobig hät er sich gwäsche und frisiert, isch us äm Hus wien än junge Pfau,
putzt und gschtrählet isch er gäg dä Morge ume cho:
grüe und blau zrugg im Bau, ohni Stutz im Sack und ohni Frau

schlofwohl Hardy, mängmol schloft mer weich und mängmol schloft mer hart i
schlofwohl Hardy, mängmol gets äs Lied und mängmol keis

alli Laschtwäge weg, no am Hardy sin no döt, dä John lauft nervös uf und ab
wo dä Hardy endlich ane schlarped luegd er en so a,
damit dä Hardy ganz genau weiss: das werd sini letschti Reis
uf dä Autobahn i sim schwere Kahn do tröschtet er sich im siebte Gang
glade hät er Saue, er denkt e chli ad Fraue, speziell ad Judith, aber au an John
- uf dä A13 isch Endstation

schlofwohl Hardy ...

er isch scho mit dä Reife uf em Pannestreife, schloht d'Auge uf aber z'spot
öber d'Böschig abe fahrt er in än Grabe, s'rüehrt en us äm Wage is Feld
jo döt liit er jetzt üsen Held

schlofwohl Hardy, mängmol schloft mer weich und mängmol schloft mer hart i,
schlofwohl Hardy mängmol gets äs Lied und mängmol keis

Binödi
dä wo vis à vis vo dir sitzt und so vor sich ane schwitzt binödi
dä wo die geschtrig Ziti lässt und wie blöd Salznüssli esst binödi
dä wo öppis säge wött und dänn sait er's glich nöd
und dänn nomol öberleit und dänn ganz öppis anders sait binödi
i bi dä wo rittet dor d'Prärie und wo alli böse vor em zittret
und wenn er d'Tör ufschloht vom Saloon dänn hebet d'Mane s'Muul zue und d'Fraue dreiet sich um

dä wo immer no witzig isch au wenn du scho lang gange bisch binödi
dä wo nomol ä Fläsche bschtellt und mit me'ne Papierli spielt binödi
dä wo sich zmitzt i dä Nacht elai uf dä Heiweg macht
und sich denn is Näscht ie leit und wann er wött säge sait binödi

i bi dä wo rittet ......

dä wo nüt zum Zmorge isst und sis Portemonnaie vergisst binödi
dä wo sin Vermieter trifft und sich döt im Ton vergrifft binödi
dä wo denn i sin're Not unrasiert und halbe tot
in ä Telefonkabine goht und zwei Mol schelle loht binödi

i bi dä wo rittet .....

Sofa
i ha Schoggi im Buch und Guetzli im Bluet
und Pommes Chips i dä Finger und glich nöd gnueg
s'isch eifach vill z'hart uf däre weiche Unterlag,
i glaub mis Sofa hät hüt nöd sin beschte Tag

bis mer bitte nöd bös i bi chli nervös i bruche öppis för mis Gmüet
eifach öppis schös
bis doch echli lieb, i glaube fascht i stirb, i weiss i bi verschrobe ä Fass ohni Bode

dä Chopf isch leer und glich z'schwer för min Arm
und son'en Hollywoodschinke git eifach viel z'wenig warm
wie wär's denn mit me heisse Bad? - s'muess nöd si i chas au lo,
villicht schlof i mer glich gschider eine n'a
s'isch eifach vill z'hart uf däre weiche Unterlag
- i glaub mis Sofa hät hüt nöd sin beschte Tag

Roti Rose
sie sinniert zum Fenschter us uf dä Schneeteppich vor em Hus
ä roti Rose liit no döt und s'schneit immer no meh druf
und er lauft dor New York beidi Händ tüf i dä Säck
er haltet a zündt sich ä Zigi a und isch mit sine Gedanke wiit wiit weg
ä roti Rose liit im Schnnee und s'schneit immer no meh druf

dä Nochschpann lauft s'isch scho lang z'spot
morn morge muesch am sechsi uf
und endlich liesch au du im Bett und irgendwenn schlofsch i
aber vorher frögsch du di no wieso dass eigentlich
niemert näb der liit?