zurück zur Diskographie

Amerika Amerika, 1996

Wolfgang Egli: Gesang, Tasten, Gitarren
Daniel Weniger: Bass, Gesang, E-Gitarre
Silvio Wyler: Saxophon
Alexander Egli: Schlagzeug

01 Ziit
02 Öppis
03 Füür
04 Müeh
05 Amerika
06 Moni (1)
07 Schach
08 Cha di nöd verstoh
09 Moni (2)
10 Lisa
11 Genau drum
12 Ziit (2)

Ziit
s'isch mol eine gsi
dä hät immer gsait, wemmer en gfröget hät
i ha kei Ziit
und sini Fründe und sini Frau händ gmeint
das saisch du jo nu so
chomm doch au
und dä Husarzt hät nu gmeint
mached sie ä Therapie
aber er hät nöd lang öberlait und dänn gsait
i ha kei Ziit
und au dä Pfarrer mit sim Rat hät gmeint
för d'Umkehr segs nie z'spot
aber er hät gfunde, das seg em z'wiit
er heb kei Ziit
und gli druf abe isch er do under än Auto cho
und sie händ en is Grab ie glait
und d'Lüt händ noch em Esse gsait
jetzt hät er jo glich recht gha dä Ma
er hät kei Ziit meh gha

Öppis
i ha der verzellt won i her chomm
vo mim Vater und minnere Muetter und minnere Schwöschter
und wien i's dähai so gha ha
i ha der verzellt won'i weg bi vo dihai
und wien'i döt und dai
d'Finger und s'Muul verbrennt ha
jo i ch säge du weisch so ziemlich öber alles Bscheid
aber öppis han i der nöd gsait

i ha der verzellt vo däne Lieberomän
won i scho mitgschpillt ha
die einte dick, die andre nu ei Siite
i ha der verzellt won i ab bi uf Amerika
will i s'letscht Kapitel nüme verlitte ha
jo i cha säge du weisch so ziemli öber alles Bscheid
aber öppis han i der nöd gsait

i ha der verzellt won i zrugg cho bi
so schö laid back
und genau denn han i di troffe
du häsch mi i dini Arme und dini Finger gno
und ab denn bin i no cheibe guet gloffe
jo i cha säge du weisch so ziemli öber alles Bscheid
aber öppis han i der nöd gsait

i ha der verzellt wieso
dass i geschter zobig nöd ha chöne cho
i ha wieder mol chli länger müese schaffe
und wommer endlich fertig gsi sind
simmer alli zäme no zum Herbert hai eis go suffe
jo i cha säge du weisch so ziemli öber alles Bscheid
aber öppis han i der nöd gsait

Füür
Irgendwo i däre Stadt
hockt er i sim Zimmer im vierte Stock
uf dä Suechi noch me Hoffnigsschimmer
glich wie geschter scho

ä Zitig liit uf äm Tisch
wo dine stoht was irgendwo irgendwenn
und irgendwie passiert isch
s'glich wie geschter scho

ä Zitig liit uf äm Tisch
wo dine stoht was irgendwo irgendwenn
und irgendwie passiert isch
s'glich wie geschter scho

uf eimol än Huufe Sirene
er goht as Fenschter und sieht roti
Füüwehrauto und Lüt am omerenne
s'Huus näbedzue isch am brenne

endlich isch mol öppis los
i däm Schiisslade
denkt er still bi sich
s'freut en bis in chline Zeche abe
er luegt fasziniert zum Fenschter us

än Polizischt secklet ufgregt hin und her
und drängt d'Meute zrugg
wo chunnt go luege
än Chrankewage fahrt uf dä Platz
und er uf sim Logeplatz

jetzt trägets die erschte uf dä Bahre weg
s'Schwizerfernseh filmet mit
und er lehnt zum Fenschter us
damit er alles gsieht

was sieht er jetzt
was sieht er denn
jetzt merkt er endlich
dass jo au die eige Hütte brennt
und s'Füür immer nöcher chunnt
und jetzt isch em klar wieso
dass d'Lüt vo dune rüefet
und winket mit dä Händ

er hät kei Ziit zum reagiere
s'verhaut em fascht dä Schnuf
ä riesigi Flamme schloht d'Töre n'uf
s'wird heiss heiss heiss

er isch scho fascht bewusstlos gsi
do fallt em zletscht no i
er chönnt hüt i dä Tagesschau cho
s'chönnt jo si
und er hät Lüt ghöre säge:
"lueg mol dä arm Cheib döt obe
kämpft om sis Läbe"

Müeh
Jo häsch du der jetzt ä Müeh geh
mi z'öberseh
luegsch eifach äs Loch id Luft
und laufsch a mer vorbi
jo mit der han i z'allerletscht no grechnet
ha nu schnell an Kiosk wöle goh
und jetzt schiffets wie us Chübel
und i schtoh wien'en Pudel do
jo wie Schiffers Claudia
uf em Laufsteg chunnsch dähär
und i lueg wienen Chindergärtler
der hinderher
jo häsch du der jetzt ä Müeh geh
mi z'öberseh
jo däbi simmer doch erscht grad no
so nöch zäme gsi

und i ha di scho lang us mim Gedächtnis gschtriche gha
ha di vergesse ha di begrabe i weiss nöd wieviel hundert Mol
jo weisch i säg der bis vor zwei Minute bisch du för mi
schwarze Schnee vo geschter nei vo vorgeschter gsi

jo häsch du der jetzt ä Müeh geh
mi z'öberseh
jo hetted mer üs früener
soviel Müeh mitenand geh
du laufsch dävo
wie am Schluss vom'ne Film
und i merk wie's im Chopf no chli tuet
aber s'wird immer besser
und jetzt isch es
guet

Amerika
s'erscht mol du mer ufgfalle bisch
do bin i grad so chli fuul im Zug ine ghocked
wie jede Tag
do fahr i dör vorbi a däre Passarelle
und dänn gsehn i di
du stohsch uf Stäge
nass und bleich im Gsicht
hebsch i a zwei Stöck und jede merkt sofort
du magsch die Stäge nüme ufe
und nüme abe
und dini Frau sie hebt di
und redet der guet zue
sie liidet mit und git sich Müeh
und macht der Muet:
"chomm nimm dä nögscht Tritt"
aber du weisch genau
din Körper macht das nüme mit
do han i müese denke
du bisch jo au mol jung gsi
häsch jo au din Traum gha
häsch wöle
uf Amerika

s'nögscht mol wo du mer ufgfalle bisch
do bin i grad so chli fuul im Zug ine ghocked
wie jede Tag
do fahr i döt vorbi a däre Passarelle
und denn gsehn i di
Stägelaufe isch jetzt keis Thema meh gsi
dini Frau sie stosst di
resigniert vor sich hi
direkt uf dä Igang zue
vo säbem brune Huus
zrugg in ä chlini Welt vo Bett und Fernseh
und abgschtandner Luft
do han i müese denke
du bisch jo au mol jung gsi
häsch jo au din Traum gha
häsch wöle
uf Amerika

s'nögscht mol wo du mer ufgfalle bisch
do bin i grad so chli fuul im Zug ine ghocked
wie jede Tag
do fahr i döt vorbi a däre Passarelle
und denn gsehn i di
du sitzesch i dim Rollstuehl
und luegsch zum Fenschter us
us eim vo säbne Fenschter
a säbem brune Hus
aber s'Fenschter isch nöd offe
will du kein Zug vertreisch
dini Frau sie schiebt der äs Chössi in Nacke
und wartet druf dass du öppis saisch
jetzt han i jedesmol usegluegt
s'isch scho fascht echli än Bruuch gsi
d'Passarelle, s'bruni Hus
und du am Fenschter regigslos
öppemol äs Auto, öppemol än Zug
öppemol äs Chind wo chli Seili gumpt
und umespringt
do han i müese denke
du bisch jo au mol jung gsi
häsch jo au din Traum gha
häsch wöle
uf Amerika

s'letscht mol wo du mer ufgfalle bisch
do bin i grad so chli fuul im Zug ine ghocked
wie jede Tag
do fahr i döt vorbi a däre Passarelle
und denn suech i di
du sitzesch nöd am Fenschter
au nöd am nögschte Tag
au nöd äs paar Täg schpöter
und i stell mer d'Frog:
"wo bisch du hi?
säg wo bisch du jetzt?"
das frög i mi
do han i müese denke
du bisch jo au mol jung gsi
häsch jo au din Traum gha
villicht bisch du jetzt
z' Amerika

Moni
wenn i wieder mol nüme weiss wo döre
wenn i s'Gfühl ha i ghöri nöd do häre
Moni, denn chomm i zu der

wenn alles um mi ome lauft und goht
und i dä bi, wo nu im Weg ine stoht
jo Moni, denn chomm i zu der

wenn d'Berge immer höcher werdet
und i so chli, dass i am liebschte wör sterbe
Moni, denn chomm i zu der

denn mach i mi wien ä Chatz
wommer usgesetzt hät
uf dä Weg zrugg zu der
und i han ä cheibe Angscht
du chönntisch nüme döte si
aber denn gsehn i di scho under dä Tür
jo du bisch do

wenn'd wieder mol nüme weisch wo döre
wenn'd s'Gfühl häsch du ghörisch nöd do häre
Moni denn chunnsch du zu mer

wenn's immer dunkler wird im Tal
und niene häts ä Loch wo du di verschlüfe chasch
Moni, denn chunnsch du zu mer
jo gell Moni, denn chunnsch du zu mer

Schach
i luege vo däm Turm obenabe uf die Stadt
wie früehner amel uf mini Isebahnalag
d'Lüt done uf dä Stross sind wie winzigi Schachfigure
dä Blick id Tüfi raubt mer dä Verstand
i fühl mi abezoge von're unsichtbare Hand
i ha fascht s'Gfühl i wör am liebschte springe

i denk a di wo'd im Läbe immer dobe bisch
vo dim Turm uf mi abeluege chasch
du häsch doch sicher än Dauerschwindel
und wenn scho, dä Turm isch jo bloss ä Schachfigur
und cha gschlage werde vom'ne Buur
oder au vom'ne Springer

i laufe d'Stäge n'abe und i denke dra
wie froh dass i bi, dass i die Stäge ha
denn wenn i sie nöd hett
i glaub denn wör i springe

Cha di nöd verstoh
cha di nöd verstoh
bisch eifach nüme do
gseh di niene meh
niene

moll i gseh di immer no
gseh di bi mer stoh
gseh di bi mer si
immer

öppis i mer sait:
"lo sie doch los, chomm hör"
und glich weiss i
i chume nöd los vo der

s'tuet so cheibe weh
bisch nüme do und glich chan i di gseh
i hett der no so viel wöle geh
alles

i glaube i muess goh
ganz wiit weg vo do
wött niemeh cho
niemeh

Lisa
jetzt hockets wieder zäme öber ehrem Projekt
d'Bauherrschaft und dä Architekt
sie diskutieret hin und her
öber Ziegel, Beton, Holz und Teer
dä Architekt zeichnet wie wild
er weiss bald selber nüme wele Strich dass gilt
s'isch immer schö, wemmer öppis cha plane
s'git Arbet för dä Bagger und dä Chrane
zur gliche Ziit hockt ä Chueh uf däre Wiese
hät dä Friede im Buuch und weiss vo nüt
ehren Name isch
Lisa

s'git ä feini s'git ä gueti Sach
vom Fundament bis ue is Dach
Stutz und Rudorf hät günschtig offeriert
wenn alles rund lauft wird morn visiert
dä Hueber vo dä UBS hät gsait sie mached mit
s'sig alles OK mit äm Baukredit
dä Gmeindamma hät geschter telefoniert
Parkplätz bruchs no meh, denn segs akzepiert
zur gliche Ziit hockt ä Chueh uf däre Wiese
hät dä Friede im Buuch und weiss vo nüt
ehren Name isch
Lisa

nüme lang do schtönds döt, ei Frau und zäh Manne
im Hindergrund isch dä Bagger und dä Chrane
alli grinsed ganz entspannt id Kamera
händ än Spate i dä Hand und äs Helmli a
s'isch klar dass sonä Foti id Ziitig mue
doch bis es sowit isch gits no chli z'tue
Telefon und Telefax laufed heiss
doch jetzt macheds Pause und suufed eis
zur gliche Ziit hockt ä Chueh uf däre Wiese
hät dä Friede im Buuch und weiss vo nüt
ehren Name isch
Lisa

mängmol chumm i mer genau so vor wie d'Lisa
hocke irgendwo blöd uf dä Wiese
und zur gliche Ziit sind es paar Herre mit Dame
irgend öppis cheibs am plane
villicht planeds bloss än Bau
villicht aber au meh
villicht än StellenabBau oder äs AKW
villicht än genmanipulierte Mensch
oder än Chrieg
wo'd besser nöd dra denksch
und mer wössed nüt
und ehr losed zue
und ich sing äs Lied
vonnere
Chueh

Genau drum
jo endlich mol äs Lied för di
i has scho mängmol versuecht
doch immer wieder vergebe
han i noch dä rechte Wörter gsuecht
jo s'isch nöd eifach di z'betöre
för di isch es Lied äs Lied
und Wörter sind Wörter
jo för di bruchts scho chli meh

genau drum han i di so gern

jo endlich mol äs Lied för di
s'hät echli duret s'isch wohr
aber wenn i's recht bedenke
du chunnsch i allne mine Lieder vor
öb du mi liebsch oder hassesch
öb du blibsch oder gosch
ohni di gits kei Lieder för mi

genau drum han i di so gern

jo endlich endlich
han i äs Lied för di
und jetzt endlich merk i
es wär jo gar nöd nötig gsi

genau drum han i di so gern